ဒေါ်လာ ရင်းဂစ် ငွေလဲနှုန်း မှားယွင်း ဖော်ပြခဲ့သည့်အတွက် ဂူးဂဲလ်မလေးရှား တောင်းပန်
အမေရိကန် ဒေါ်လာနှင့် ရင်းဂစ်အကြား မှားယွင်းသော ငွေလဲနှုန်းကို Google မှ မတ်လ ၁၅ ရက်နေ့တွင် ပြသခဲ့ကြောင်း မလေးရှား ဗဟိုဘဏ် Bank Negara Malaysia (BNM) မှ သတင်းထုတ်ပြန်ချက်တွင် ဖော်ပြထားသည်။
ထိုသို့သော အမှားမျိုးကို Google က ပြသသည်မှာ ၂၀၂၄ ခုနှစ်တွင် ၂ ကြိမ် ရှိသွားပြီဟု BNM က ပြောကြားသည်။
လက်တွေ့ ရောင်းဝယ်ဖောက်ကားမှုကို ဖော်ပြထားခြင်း မဟုတ်သည့် မမှန်ကန်သော အချက်အလက်ဖြစ်သည်ဟု BNM က ပြောကြားသည်။
မတ်လ ၁၅ ရက်နေ့တွင် ဘဏ်၏ တရားဝင် ၀ က်ဘ်ဆိုက်မှာ နံနက် ၉ နာရီ တစ်အမေရိကန်ဒေါ်လာကို ရင်းဂစ် ၄.၇၀၁၅ ဖြင့် အရောင်းအ၀ယ်ပြုလုပ်ခဲ့ကြောင်းဖော်ပြခဲ့သည်။ ညနေ ၅ နာရီ ဈေးကွက်ပိတ်ချိန် ငွေလဲနှုန်းမှာ တစ်အမေရိကန်ဒေါ်လာကို ရင်းဂစ် ၄.၇၀၄၅ ဖြင့် ဈေးပိတ်ခဲ့သည်။ တနေ့တာ အမြင့်ဆုံး ငွေလဲနှုန်းမှာ တစ်အမေရိကန်ဒေါ်လာကို ရင်းဂစ် ၄.၇၀၇၅ ဟု ဗဟိုဘဏ် ဝဘ်ဆိုက်တွင် ဖော်ပြခဲ့သည်။
ဂူးဂဲလ်က တနေ့တာ အမြင့်ဆုံး ငွေလဲနှုန်းမှာ တစ်အမေရိကန်ဒေါ်လာကို ၄.၉၈ ရင်းဂစ်ဟု ဖော်ပြခဲ့သည်။
BNM က အမှားအယွင်းသည် ပထမဆုံးမဟုတ်ကြောင်းနှင့် ဖေဖော်ဝါရီ ၆ ရက်က အလားတူဖြစ်ရပ်မျိုး ဖြစ်ပွားခဲ့ကြောင်း ပြောကြားသည်။ ထိုစဉ်က ဗဟိုဘဏ် BNM က ဂူးဂဲလ်ကို သတိပေးစာ ထုတ်ပြန်ခဲ့သည်။
Google Malaysia သည် ၎င်း၏ဘဏ္ဍာရေးစာမျက်နှာတွင် လွှင့်တင်ထားသော ကန်ဒေါ်လာ-ရင်းဂစ် (USD-MYR) လဲလှယ်နှုန်းမှားယွင်းမှုအတွက် တောင်းပန်ကြောင်း ကြေညာချက် ထုတ်ပြန်သည်။
သတင်းအချက်အလက် ပေးအပ်ရန် ရည်ရွယ်ချက်ဖြင့် ဖော်ပြပေးခြင်း ဖြစ်သဖြင့် ဘဏ္ဍာရေးဆိုင်ရာ ဆုံးဖြတ်ချက်များ ချရန်အတွက် Bank Negara Malaysia (BNM) ကဲ့သို့သော တရားဝင်ရင်းမြစ်များနှင့် တိုင်ပင်ပါဟု ဂူးဂဲလ်က ရေးသားထားသည်။
Comments
Post a Comment