ဒါကာ နှင့် ဗီယင်ကျန်း တိုက်ရိုက်ခရီးစဉ်များ MAI ပျံသန်းမည်
အပြည်ပြည်ဆိုင်ရာ မြန်မာ့လေကြောင်း Myanmar Airways International (MAI) သည် ရန်ကုန် ⇆ ဗီယင်ကျန်း(လာအို)၊ ဒါကာ (ဘင်္ဂလားဒေ့ရှ်) နှင့် ရန်ကုန်⇆ချင်းမိုင် (ထိုင်း)တို့အကြား တိုက်ရိုက်ပျံသန်းမည့် ခရီးစဉ်များကို လာမည့် မေလအစောပိုင်းတွင် စတင်မည်ဖြစ်ကြောင်း မကြာသေးခင်က ကျင်းပခဲ့သည့် MAI Flight Forward အခမ်းအနားတွင် ကြေညာခဲ့သည်။
MAI ၏ ခေတ္တ စီအီးအိုနှင့် စီးပွားရေးအရာရှိချုပ် Tanes Kumar က လေကြောင်းလိုင်းသည် ဗီယင်ကျန်း(လာအို)၊ ချင်းမိုင် (ထိုင်း)၊ ဒါကာ (ဘင်္ဂလားဒေ့ရှ်) အစရှိသည့် မြို့များသို့ ခရီးစဉ်များ တိုးချဲ့ပျံသန်းမည်ဟု ပြောကြားသည်။
ပြည်ပခရီးစဉ်များ ၂၁ ခု ရှိသည်အထိ တိုးချဲ့မည် ဖြစ်သည်။
ရန်ကုန် ⇆ ဗီယင်ကျန်း(လာအို) ခရီးစဉ်ကို မေလ ၄ ရက်တွင် စတင်ပျံသန်းမည်။ အပတ်စဉ် အင်္ဂါနေ့နှင့် ကြာသပတေးနေ့ တပတ် ၂ ကြိမ် ပျံသန်းမည်။
၁၉၈၀ ပြည့်လွန်နှစ်များတွင် လာအိုလေကြောင်းလိုင်းသည် အမြတ်အစွန်း မရရှိခြင်းကြောင့် ရန်ကုန်သို့ ပျံသန်းမှု ရပ်ဆိုင်းခဲ့သည်။ ထိုစဉ်မှစ၍ လာအိုနှင့် မြန်မာတို့အကြား တိုက်ရိုက်လေကြောင်း ခရီးစဉ် မရှိတော့ချေ။
မြို့တော်ဗီယင်ကျန်းနှင့် ရန်ကုန်တို့အကြား လေကြောင်းခရီးစဉ် ပြန်စရန် ၂၀၁၃ ခုနှစ် နှစ်ဆန်းပိုင်းတွင် စီစဉ်ခဲ့သော်လည်း Lao Airlines က အစီအစဉ်ကို ပြန်ရုပ်သိမ်းခဲ့သည်။ အဓိကအကြောင်းရင်းမှာ လုံလောက်သော အမြတ်အစွန်း မရနိုင်သောကြောင့် ဖြစ်ပါသည်။
Comments
Post a Comment