ကုန်သွယ်မှု ငွေပေးငွေယူ ယွမ် လူကြိုက်နည်း

 တရုတ်အစိုးရက ပြည်ပကုန်သွယ်မှုများတွင် ယွမ် သုံးစွဲမှုကို မြှင့်တင်ပြီး ဒေါ်လာကို အစားထိုး နေရာဝင်ယူရန် ကြိုးပမ်းဆောင်ရွက်နေသော်လည်း တရုတ်နိုင်ငံ၏ ပဉ္စမအကြီးဆုံးဘဏ် Bank of Communications နှင့် Renmin University မှ International Monetary Institute တို့ ပူးတွဲထုတ်ပြန်သည့် ပထမသုံးလပတ်အတွက် Cross-Border Yuan Insight စစ်တမ်းအသစ်၏ တွေ့ရှိချက်များအရ “ကုန်သွယ်ဖက်များကြားတွင် ယွမ်ငွေကို သုံးစွဲရန် ဆန္ဒမရှိခြင်း” သည် နယ်စပ်ဖြတ်ကျော် ကုန်သွယ်မှု ငွေပေးချေခြင်းများအတွက် အကြီးမားဆုံး အတားအဆီးအဖြစ် ရှိနေသေးသည်။

စစ်တမ်းတွင် ပါဝင်ဖြေဆိုသော လုပ်ငန်းများ၏ ၄၇.၇% ခန့်က ယွမ်ငွေကို အသုံးပြုရန် ကုန်သွယ်ဖက်များအကြား စိတ်ဝင်စားမှု နည်းပါးခြင်းသည် ယွမ် သုံးစွဲမှု တွင်ကျယ်လာစေရေးအတွက် အဓိက အဟန့်အတား ဖြစ်နေသည်ဟု ဖြေဆိုကြသည်။

ဖြေဆိုသူများအနက် သုံးပုံတစ်ပုံခန့်ကမူ အခက်အခဲအဆင့်သည် ယခင်နှစ်ကအတိုင်းပင်ဖြစ်ပြီး မပြောင်းလဲသေးကြောင်း ပြောဆိုကြပြီး ၁၁ ရာခိုင်နှုန်းခန့်က ပိုဆိုးလာသည်ဟု ယူဆကြသည်။

မတ်လတွင် ကုမ္ပဏီပေါင်း ၁၆၅၇ ခုကို စစ်တမ်းကောက်ယူခဲ့ရာ၌ အကြမ်းအားဖြင့် ၇၁% မှာ ပုဂ္ဂလိကလုပ်ငန်းများဖြစ်ပြီး ၁၃% မှာ နိုင်ငံပိုင်စီးပွားရေးလုပ်ငန်းများဖြစ်ကြသည်။ ၁၅ % မှာ နိုင်ငံခြားမှ ရန်ပုံငွေဖြင့် လုပ်ကိုင်သည့် လုပ်ငန်းများဖြစ်သည်။

အမေရိကန် ဒေါ်လာသည် ကမ္ဘာ့ကုန်သွယ်မှုအပေါ် စိုးမိုးလွှမ်းခြုံထားနိုင်ခြင်းကြောင့် အမေရိကန်က နစ်နာအောင် ဒဏ်ခတ်ပိတ်ဆို့မှုများ ချမှတ်ခြင်းနှင့် အခြားဘဏ္ဍာရေးစစ်ပွဲပုံစံများကို ဆင်နွှဲရာတွင် အတိုင်းအတာတစ်ခုအထိ အစွမ်းထက်နေစေသည်။

သို့ဖြစ်ရာ ယွမ်ကို ကမ္ဘာသုံးငွေကြေး ဖြစ်လာအောင် လုပ်ခြင်းဖြင့် ဒေါ်လာကို အံတုနိုင်မည့် ရည်မှန်းချက်သည် အလှမ်းဝေးနေကြောင်း စစ်တမ်းရလဒ်များက ဖော်ပြနေသည်။

Source cna

#BankingIndust

ryGuide